ROXAS CITY – Padayon nga pagpamigado sang pumuluyo ang isa sa rason ni anay Interior Secretary Mar Roxas agud liwat nga magpapili sa pagka-senador para sa May 2019 midterm elections.
Sa exclusive interview sang Bombo Radyo Roxas sa anay tiglikom, ginpahayag sini nga apisar mas madamo na siya sang oras sa karon sa iya nga pamilya, nagdesisyon ini nga liwat magpadalagan bangud nabatyagan niya nga kinahanglan sini buligan ang suno sa iya, mas nagadamo nga pigado nga mga pumuluyo.
Ginpahayag pa sini nga isa sa partikular nga rason sang pagpamigado sang mga Pilipino amo ang implementasyon sang Tax Reform for Acceleration and Inclusion (TRAIN) Law nga rason sang pagtinaas sang mga balaklon kag ang ginapatong nga excise tax sa produktong petrolyo sa pungsod.
Bangud diri, pagatutukan sang anay tiglikom ang pagpasanyog sa ‘personal economic’ sang pumuluyo, kag pasanyugon man ang mga ‘small, micro and medium enterprise’ nga daku ang kontribusyon sa ekonomiya sang pungsod.
Ginpahayag pa sini nga ilabi pa nga nangin bug-os ang iya nga desisyon nga magpapili sa pagka-senador matapos siya nagpangadi para sa ‘discernment’.
Mahibaluan nga sa Bombo Radyo Roxas ang pinakauna nga media interview sang anay tiglikom kasunod sang iya nga pagsumiter sang iya nga COC.
Matapos gin-anunsiyo sadtong Lunes nga adlaw ang iya liwat nga pagsulod sa patag sa pulitika, pormal nga nag-file sang iya nga COC ang anay tiglikom kahapon nga adlaw.
