ROXAS CITY – Liwat nga nangin sentro sang diskurso-pribiliheyo ni Board Member Thea Faith Reyes, chairman sang Committee on Education sa sesyon sang Sangguniang Panlalawigan ang kontrobersiyal sa karon nga scholarship program sang gobyerno-probinsiyal.
Ginsambit ni Reyes ang pangalan ni provincial administrator Edwin Monares natuhoy sa nangin ‘challenge’ sini sa nakaligad nga Del Rosario administration nga ihatag ang records sang scholarship program bangud sa alegasyon nga wala nila ini ginbilin antes nagkambyo ang administrasyon.
Apang ginklaro ni Reyes nga natugyan sang nakaligad nga administrasyon sa Contreras administration ang records sang scholarship program nga yara sa Internal Audit Service (IAS).
Ginkwestiyon pa ni Reyes kun ano ang buot silingon ni Monares sa iya nga pagpanghangkat sa nakaligad nga administrasyon bangud natugyan man ang records nga iya ginapangita.
Sa subong nga tion suno kay Reyes, indi ini tiyempo sang pagbinasulay sa baylo tion ini para sa paghugpong sang tanan para sa kaayuhan sang mga scholars sang probinsiya.
Ginklaro man ni Reyes nga indi sini intensiyon nga pakalainon si Monares apang nagahinyo ini sa administrador nga mangin mapinaubuson para sa kaayuhan sang kadamun.
Nagpangabay man si Reyes nga kuntani sa palaabuton nga kinahanglan sang kooperasyon, magabuligay ang tanan sa pagpakita sang ila dedikasyon kag sensiro nga pagpanerbisyo sa pumuluyo.
Mahibaluan nga sandig sa datos nga ginpresentar ni Reyes, sa kabug-usan nga 4, 951 nga scholars sang gobyerno probinsiyal, 4,459 diri ang enrolled samtang may 492 nga wala nakapa-enroll.
Sa mga enrolled scholars, 2, 361 diri ang yara sa private school samtang 2, 098 naman ang yara sa public school.
