ROXAS CITY – Ginakabig nga political persecution kag political harassment sang kongresista sa premier distrito sang Capiz ang pagdakup kag pagpagbilanggo kay Senator Leila de Lima sang administrasyon ni President Rodrigo Duterte.
Sa interview sang Bombo Radyo kay Capiz 1st Congressman Emmanuel ”Tawi” Billones Sr., ginpahayag sini nga ginahingabot ang senadora sang administrasyon bangud kilala ini nga numero uno nga kritiko ni Duterte.
Nagpanindugan ang kongresista nga magahimo sang pamaagi ang partido Liberal para mapahilway si de Lima.
Apang sa karon moral support lamang ang ila nga mahatag sa kapartido.
Samtang ginpanginwala naman ni Billones ang alegasyon nga ginasabotahe sang LP ang pagpadalagan sang administrasyon sa pungsod.
Suno sa kongresista nga produkto lamang ini sang sala nga espekulasyon sang iba nga mga tawo nga wala sang mahimo sa ila kabuhi.
