ROXAS CITY -Temporaryo nga iga-kanselar sang provincial government ang mga mercy voyage kag sweeper flights sakay ang mga Locally Stranded Individuals ukon LSI’s nga natalana nga magapauli sa probinsiya sang Capiz.
Ini ang ginkompirmar ni Capiz Governor Esteban Evan Nonoy Contreras sang mainterview sang Bombo Radyo.
Ginpahayag ni Contreras nga magasunod ang probinsiya sa mandu sang National Inter-Agency Task Force nga ipaidalum sa real-time polymerase chain reaction (RT-PCR) test ang mga LSI’s nga magapauli sa mga kaprobinsiyahanan.
Bangud sini, kanselado ang natalana nga mercy voyage sakay ang kapin 400 ka mga LSI’s sa maabot nga Lunes nga adlaw kag ang natalana nga sweeper flights sa masunod nga semana.
Samtang ginpasalig ni Contreras nga magapadala ini sang sulat agud mag-apelar sa national IATF nga mapasugtan nga makapauli ang mga LSI’s sa probinsiya kag pag-abot diri, ipaidalum sila sa RT-PCR test.
