Ginpahayag ni House Prosecutor kag Manila Representative Joel Chua nga daku nga desisyon para sa mga abogado ni Vice President Sara Duterte kon magatestigo ini sa iya impeachment trial bangud magaagi siya sa cross-examination sang prosecution.
Suno kay Chua, diskarte na sang kampo sang depensa kon nagapati sila nga makabulig sa ila kaso ang pagpatestigo mismo sang Bise Presidente.
Gin-athag man sini nga kon mag-atubang sa trial si Duterte, una anay ini nga usisaon kag pangayuan sang pahayag sang iya kaugalingon nga mga abogado.
Pagkatapos sini, may kinamatarong naman ang House prosecutors nga pamangkuton kag usisaon ang Bise Presidente agud mausisa ang iya mga pahayag.
Natalana ang pre-trial conference sang Senado sa Hunyo 18, samtang ang pormal nga trial magasugod sa Hulyo 6.
Na-impeach si Duterte sang Kamara sang mga Representante sang Mayo 11, 2026 matapos aprobahan sang 257 ka mamalidha ang reklamo batok sa iya may kaangtanan sa korapsyon kag indi insakto nga paggamit sang pondo sang gobyerno.
