Nagapati ang isa ka scuba diver nga madamo sang mga dapat i-konsidera antes salumon ang Taal Lake sa diin ginapatihan nga amo ang ginhabuyan sang mga bangkay sang 34 ka mga manugbulang.
Sa interview sang Bombo Radyo kay Atty. Roman Almalbis, iya ginpahayag nga bilang isa ka scuba diver indi mahapos nga magsalom sa Taal Lake, bangud posible mabutang sa delikado ang sitwasyon sang mga indibidwal nga magapatigayon sang sini nga akto.
Suno kay Almalbis, ang Taal Lake ang nahamtang malapit sa bulkan sa diin may yara ini sang mga elements kaangay sang sulfur nga delikado sa ikaayong lawas.
Magluwas diri, nagadalom man ang Taal Lake sang 172 meters sa diin mabudlay ini tungkaron.
Dugang pa, posible man nga indi mahapos makit-an kun may yara gid man sang may ginhaboy nga mga bangkay sa idalom sang Taal Lake tungod tuig 2021 pa ini natabo kag posible nga tul-an nalang ang mga ini.
Nagakinahanglan man suno sa natungdan sang mga high technology nga mga equipment agud makapatigayon sang pag-usisa sa idalom sang Taal Lake.
Interviewed by Bombo Francis Biñas
