Nagapanawagan ang Paghugpong sang mga Mangunguma sa Panay kag Guimaras (PAMANGGAS)sa gobyerno nga maghatag sang production subsidies sa mga mangunguma kag mamumugon sa katubohan nga apektado sang red-striped soft scale insect (RSSI).
Sa interview sang Bombo Radyo kay PAMANGGAS Chairperson Lucia Capaducio, iya ginpahayag nga dapat mangin madasig ang gobyerno sa pagbulig sa mga mangunguma kag mamumugon nga nagadepende sang ila palangabuhian sa nasambit nga industriya.
Suno kay Capaducio, kinahanglan sang production support sang mga mangunguma bangud limitado lang ng ila nga kwarta agud makahimo sang tikang sa pagpugong sang paglapta sang RSSI.
Sa inisyal nga report, nagapakita nga ginabanta 30,208 ektarya sang katubohan sa Western Visayas ang naapektohan sang peste sa diin 2.3 million metric tons sang produksyon sang tubo kag 8,000 mga mangunguma ang apektado.
Sa Capiz, 11 ka mga banwa ang apektado sa diin sakop sini ang ginabanta 2,000 ektarya sang pananom.
Nagpaandam man ang natungdan nga kun magapadayon ang pagnubo sang produksyon sang tubo, posible nga ikonsidera naman sang gobyerno nga mag-import sang kalamay.
