ROXAS CITY – Ginpanindugan sang isa sa mga kapitan nga nagpirma sa manifesto nga nagapamalibad sa pagtambong sa Municipal Development Council (MDC) sa banwa sang Panay, nga indi sila magtambong sa pagahiwaton liwat nga MDC meeting.
Ini ang ginpahayag ni Punong Barangay Jill Dice, Barangay Kapitan sang Lus-onan, sa amu nga banwa, sang mainterview sang Bombo Radyo.
Suno diri, indi sila magtambong nga mga kaupdanan sini nga nagpirma man sa manifesto, bangud sa ginhimo ni Mayor Felipe Barredo sa ila Liga President nga pagpangtabog sa nauna nga pagsinapol sang MDC.
Ginkumpirmar man sini nga may imbetasyon sila sa pagahiwaton kuntani nga paghinun-anon apang, ila nga ginapanindugan nga indi magtambong.
Pahayag sang Kapitan nga panahon gid lamang ang makasiling ukon ang ginahulat agud ma-implement ang mga proyekto.Apang, para sa iya bukas ini nga paga-istoryahan sang ila grupo.
Nahibaluan nga wala pa maaprubahan ang 2022 nga pondo sang ila LGU bangud wala pa mapapasar ang ila annual investment plan sa lebel sang MDC.
