Temporaryo nga ipauntat ang operasyon sang Panay Christmas Village sa Panay, Capiz.
Ini ang kaundan sang resolusyon nga ginbalay ni SB Member Paolo Bigcas Besa agud iduso sa Sangguniang Bayan kag hinyuon kay Panay Mayor Felipe Barredo nga ipauntat ang operasyon sang nasambit nga atraksyon sa amu nga banwa.
Sa interview sang Bombo Radyo Roxas kay Besa, tinutuyo sang ginhimo sini nga resolusyon amu nga masabat ang pila ka mga reklamo nga ginpaabot sa iya kapareho sang problema sa basura kag kaangay nga wala masyado na-preparahan ang pagbukas sang amu nga atraksiyon.
Gintawag sini nga wala sang disiplina ang mga indibidwal nga nagabisita sa lugar bangud sa mga basura nga ginabilin.
Sa pihak nga bahin, ginpahayag pa ni Besa nga malayo pa nga malab-ot sang banwa sang herd immunity bangud man sa mahinay ang vaccination program.
Ginalantaw naman nga bangud sa kakulangan sang mga health workers nga nagabakuna ang rason sang magamay nga mga pumuluyo ang nagapabakuna.
Nagasalig naman si Besa nga maaprubahan ang resolusyon sini.
