May ara sang pila ka mga pangalan nga nakalista sa recipients sang confidential funds sang OVP kag DepEd nga may kapareho sa mga record sang Philippine Statistics Authority nga mga nagtaliwan na.
Nalakip diri ang pila ka indibidwal kag mga menor de edad.
Suno kay PSA Assistant National Statistician Marizza Grande, may ara sang 34 ka signatory sa acknowledgement receipts nga may single-match entries sa PSA records.
Isa sa mga namensyonar ni Grande amo si Marlin Sunga nga base sa death certificate ang napatay sadtong Nobyembre 1965 kag duwa pa lamang ka bulan ang edad.
Ginpakita man sa trial ang acknowledgement receipts nanday Fortunato Salig, Emilio Sagan, kag Rodolfo Traya kun sa diin may ara sang kabilugan nga nakuha nga P390, 000.
Magluwas diri, ginpahayag man ni Grande nga may ara sang 20 ka menor de edad sa listahan sang OVP kag listahan sang DepEd kun sa diin nalakip sanday Miko Alquizar kag Beatrice Cuenca, nga parehos ginbun-ag sadtong 2022 kag Mikay Delos Reyes nga nabun-ag lamang sadtong 2023.
