ROXAS CITY – Ginbuyagyag sang isa ka centenarian nga pangamuyo kag pagkaon sang utan kabaylo sang baboy ang sekreto para maabot ang 100 ka tuig nga edad.
Ini ang ginpahayag ni Maria Andrada, ginbun-ag sang Mayo 22, 1922 kag nag-saulog sang iya ika-100 nga kaadlawan subong nga adlaw sa Sitio Baybay, Barangay Poblacion banwa sang Sapian.
Sa interview sang Bombo Radyo kay Judith Ocana, bata ni Nanay Mary, relihiyosa kag limitado sa pagkaon sang madamo ang iya iloy rason nga wala gid ini naka-angkon sang grabe nga balatian nga ila ginkabalak-an.
Dugang pa ni Ocana, isa ka “ideal mother” si Nanay Mary kun sa diin nagtimakas ini nga mapa-eskwela sila nga mag-ulutod apisar nagapangutang para lang mahatag ang ila kinahanglanon dala sa pagpati sa ka-importansya sang edukasyon.
Ginpahayag man ni Ocana, nga indi sini malipatan ang advise sang ila iloy nga “kun magmasakit, magpa check-up dayun agud mabulong insigida” nga tubtob sa karon gina-ubra nila nga mag-utod.
Dako ang pasalamat ni Ocana sa Makaako sa mga grasya nga ila nabaton kag sa dugang nga tuig nga ginhatag sa ila iloy.
Mahibaluan nga magabaton sang P100,000 si Nanay Mary sa idalum sang RA 10868 ukon Centenarians Act of 2016.
