BORACAY ISLAND – Panibag-o nga suspected illegal sewage line na naman ang ginpakutkot sang Department of Environment and Natural Resources sa bahin sang Station 2, Barangay Balabag, isla sang Boracay.
Ini matapos nga nagguha sa ginpatigayon nga survey sang Mines and Geosciences Bureau gamit ang ila nga Ground Penetrating Radar nga may yara sang linya sang tubo sa idalom sang duta.
Nahibaluan nga may ginsarado nga creek sa lugar kag ginpahamtangan sang box culvert sang gobyerno sang banwa sang Malay, Aklan agud indi na maka-ilig sa dagat ang mahigko nga tubig gikan sa estero.
Ginkatingala lamang sa karon ni Atty. Richard Fabila sang CENRO-Boracay kun ngaman may nagaguha sa gihapon nga tubig sa punta sang box culvert apisar nga sarado na ini.
Samtang paathag naman ni Engr. Rey Yulo, consultant sang D’Mall nga tubig-ulan lamang ang nakadeposito sa box culvert kag wala ini naggikan sa mga establishment.
Nagapadayon sa karon ang DENR sa pagkutkot sa lugar agud mahibaluan ang ginahalinan sang madamo nga tubig.
