Gin-athag sang Punong Barangay sang Tuburan, Maayon, Capiz nga wala nila gintago sa publiko ang listahan sang mga estudyante nga ginpili bilang benepisyaryo sang P20,000 sa idalom sang Bawat Barangay Makikinabang program.
Sa interview sang Bombo Radyo kay Punong Barangay Renante Alarcon, iya ginpahayag nga nakapasa na sila sang listahan sang lima ka benepisyaryo sa national office sang Pebrero subong nga tuig.
Suno kay Alarcon, ang mas detalyado nga guidelines para sa scholarship ang ulihi na nga nag-abot sa ila matapos na mapadala ang listahan sang mga napilian nga estudyante.
Nagapanindugan ang Punong Barangay nga ang lima nga mga ginlista nga mga estudyante ang deserving agud mangin presidential scholar.
Dugang pa sini, indi na nila mahimo nga ilisan ukon bag-uhon ang mga pangalan sang mga estudyante nga yara na sa opisyal nga listahan bangud napasa na ini kag ginproseso na sang natungdan nga ahensya.
Ginpasiguro man sang punong barangay nga bukas kag handa ini nga magsabat sa mga pamangkot sang publiko natuhoy sa proseso sang pagpili sang mga benepisyaryo sang scholarship program.
