ROXAS CITY – Madinalag-on ang pagpatigayon sang greyhound operation ukon Oplan-Galugad kag Surprise drug testing sang Philippine Drug Enforcement Agency (PDEA) – Capiz kaupod ang katapo sang Bureau of Jail Management and Penology (BJMP) sa mga persons deprived of liberty (pdl’s) sa Roxas City Jail Male Dormitory Brgy San Jose Roxas City, sang Mayo 26.
Ini ang ginkumpirmar ni Agent Alvin Clemente, Assistant Provincial Officer sang PDEA-CAPIZ sang mainterview sang Bombo Radyo.
Suno diri, nagamit sila sang K9-unit agud masiguro nga wala sang iligal nga druga nga ginatago ang mga PDL’skag personnels.
Tinutuyo sang Oplan-Galugad nga masiguro nga wala sang may nagasulod kag nagahiwat sang iligal nga buluhatonsa sulod sang Roxas City Jail.
Natigayon naman nga mapaidalum sa suprise drug testing ang 28 ka mga katapo sang BJMP kag 60 ka mga PDL’s nga lunsay nangin negatibo ang resulta.
Dugang pa ni Clemente, nga ini ang ikaduha ka beses nga nagpatigayon ang ahensya sang Oplan-Galugad sa nasambit nga lugar kag suno diri may yara pa sang mga masunod nga operasyon.
Samtang, padayon ang pagmonitor sang PDEA sa mga personalidad nga nagahiwat sang iligal nga buluhaton ukon paggamit kag pagduso sang iligal nga druga sa probinsya sang Capiz.
