Gin-anunsyo sang Philippine National Police (PNP) ang temporaryo nga suspension sang Permits to Carry Firearms Outside of Residence (PTCFOR) sa bug-os nga probinsya sang Capiz para sa selebrasyon sang Capiztahan Festival 2026.
Base sa memorandum nga ginpirmahan ni Police General Jose Melencio Nartatez, Jr., ipatuman ang permit suspension humalin 12:01 AM sang Abril 13 tubtub 11:59 PM sa April 19, 2026.
Sa sini nga tion, ginadumilian ang pagdala sang armas luthang sa guwa sang mga puluy-an, magluwas lang sa mga katapo sang PNP, Armed Forces of the Philippines (AFP), kag iban pa nga law enforcement agencies kag uniformed personnel.
Ang ini nga tikang ang kabahin sang pagtinguha nga mapabaskog ang seguridad kag kaluwasan sa bug-os nga probinsya kadungan sang Capiztahan Festival, nga ginalauman nga makaganyat sang pagdagsa sang mga bisita kag lokal nga pumuluyo.
