CAPIZ – Nagpakig-angot ang Public Employment Services Office- Capiz sa Department of Migrant Workers agud masiguro ang kaluwasan sang Capiznon sa Middle East.
Ini ang kasunod sang nagalala nga tensyon sa tunga sang Israel kag Iran nga nagtuga sang tuman nga kahalitan kag kahadlok sa mga pumuluyo.
Sa interview sang Bombo Radyo kay John Leo Marco Beldia, Manager sang Public Employment Services Office- Capiz, iya ginpahayag nga ginpatigayon ang nasambit nga koordinasyon upod ang Department of Migrant Workers agud mahibaluan ang insakto nga numero kag kahimtangan sang mga Overseas Filipino Workers (OFWs) nga gikan sa Capiz.
Suno kay Beldia, lakip sa mga tikang amo ang pagmonitor sa ila kahimtangan paagi sa opisyal nga komunikasyon kag paghatag sang kinahanglanon nga impormasyon sa mga pamilya sa probinsya.
Gin-athag man sang talatapan nga bukas ang ila opisina para sa mga himata sang Overseas Filipino Workers (OFWs) nga may pamangkot ukon nagakinahanglan sang bulig may kaangtanan sa sitwasyon sang ila mga himata sa abroad.
Pahayag pa niya, ginapabaskog man ang pagpalapnag sang verified nga impormasyon agud malikawan paglapta sang indi kumpirmado nga balita ukon fake news.
Sa pihak sang nagapadayon nga kahimtangan sa pila ka bahin sang Middle East, ginpasiguro sang Department of Migrant Workers nga handa sila maghatag sang assistance, lakip ang repatriation kun kinahanglanon, kag legal ukon welfare assistance para sa mga apektado nga Overseas Filipino Workers (OFWs) .
Nagpahanumdom man ang natungdan sa tanan nga Capiznon nga yara sa abroad ilabi na sa Middle East nga magpabilin nga alerto, magsunod sa mga advisories sang mga otoridad sa ila ginatiniran nga pungsod, kag magpakig-angot sa Philippine Embassy ukon Consulate kun may emerhensya.
INTERVIEWED BY: BOMBO ROADNIE DABAN DALANON AND BOMBO VINZ DEOCAMPO
