CAPIZ – May ginahimo na sa karun nga tikang ang pamunuan sang Philippine Army, agud malikawan nga makumbinsi ang mga estudyante nga mag-upod sa pagrecruit sang mga rebelde nga grupo sa ila hanay.
Ini matapos naglupok ang pahayag kun sa diin sa ginpatigayon nga hearing sang Senate panel sa public order and dangerous drugs, nga nagpanguna sa listahan ang Putian National High School sa 23 ka mga buluthuan nga gintumod ni PNP Directorate for Operations Colonel Randy Arceo nga may nagakahinabo nga recruitment activity sang rebelde nga grupo.
Sa interview sang Bombo Radyo kay Lt. Col. Jay Javines, tagpamaba sang Philippine Army 3ID ginpahayag sini nga padayon nga gina-imbestigahan sang ila units ang amu nga buluthuan.
Suno kay Javines, nga ang nasambit nga report nga ginbasehan sang PNP ang 2014 tubtob subong nga tuig kun sa diin madugay na ang amu nga pahayag apang sa karun wala na sila sang may nabaton nga report angut diri.
Ginpahayag man sini nga may mga aktibidad nga nagakahinabo kaangay sini apang madugay na bangud may mga estudyante nga napatay kag naulamid sa tion sang engkwentro.
Posible man suno kay Javines nga nahimo sa gihapon sang mga rebelde nga grupo nga magpangrecruit nga wala sang ihibalo ang pamunuan sang eskwelahan bangud madamo ini sila sang pamaagi.
Bangud sini, nagapatigayon ang ila hanay sang information awareness drive sa mga eskwelahan agud mapa-alintun ang mga estudyante sa pamaagi nga pagrecruit sang rebelde nga grupo.
