Nagdeploy ang Philippine National Police (PNP) sang indi magnubo sa 2,250 ka mga kapulisan bilang dugang nga bulig sa mga naapektuhan sang magnitude 6.9 nga linog nga nag-igo sa Cebu.
Suno kay Directorate for Police Community Relations Deputy Director PBGen. Antonio Marallag Jr., ini nga mga pulis ang nagikan sa nagkalain-lain nga units nga gin-assign bilang dugang nga manpower sa Cebu.
Samtang naka-deploy ang bulto sang pwersa gikan sa Police Regional Office 7, nag-deploy man ang National Police sang augmentation halin sa PRO 8, Negros Island Region kag bisan sa iban pa nga units. Ini nga mga personnel ang nakatutok subong sa pagbulig sa mga relief operations sa lugar subong man sa rehabilitasyon sa mga apektado nga lugar.
Pagatutukan man sang kapulisan ang pagmentinar sang seguridad kag safety sang publiko nga apektado sang linog.
Tubtob subong, 34 ka mga istasyon sang PNP ang nalakip sa mga nahalitan sang linog samtang 37 naman ka mga pulis ang apektado.
