ROXAS CITY, CAPIZ – Naghalalin ang pila ka mga vendors nga ginsaylo sa Teodoro Arcenas Trade Center.
Matandaan nga masobra 200 ka mga vendors nga nagikan sa Burgos Talipapa ang ginsaylo sa TATC old meat section area sang Nobyembre 5, 2024.
Sa interview sang Bombo Radyo kay nanay Inday, tatlo nalang sila ang nabilin nga nagabaligya kun aga kag kun hapon naman nagadalagan sa pulo (10) tubtob kinse (15) ka mga vendors ang nagabalik agud magbaligya.
Suno kay nanay Inday nga nagsaylo ang iban nga vendors pamaligya sa kilid sang karsada sang Brgy. Banica, Brgy. Lawa-aan kag Brgy. Dayao bangud mahina ang kita sa TATC kun sa diin nagakaladunot kag nagakalub-ok ang ila baligya nga utan kag isda.
Pahayag pa sini nga ang rason kun ngaa mahina ang bentahanay sa ila ginaplastaran sa karon nga old meat section sang TATC bangud malapit sila sa wholesaler kag ginapakamaayo sang mga manugbakal nga didto magpamakal kag ang iban naman sa guwa nagabakal bangud barato.
Magluwas sini, suno pa kay nanay Inday nga problema man nila ang madanlog nga tiles sa ila napahamtangan kun sa diin wala sang guwaan ang tubig rason nga mabasa kag may nakaagi na danlog nga costumer nga isa man sa rason nga wala gawa sang may nagasulod agud magpamakal.
Ginahinyo sini nga kuntani butangan man sang karne sang baboy kag manok agud makahulag man ang utan nila nga ginabaligya.
Mahibaluan nga ginpabilin sa Burgos Talipapa ang mga vendors sang karne sang baboy kag manok.
