Pila ka mga pamilya sa Quezon City kag Malabon ang nag-evacuate matapos naglapaw sa spilling level ang La Mesa Dam bangod sang mabaskog nga ulan dala sang Habagat.
Naglab-ot sa 80.22 meters ang lebel sang tubig sa dam, mas mataas sa 80.15 meters nga spilling level.
Sa Malabon, 30 ka pamilya ang nag-evacuate kag temporaryo nga nagapabilin sa Tinajeros Elementary School.
Samtang, 85 ka pamilya halin sa Quezon City ang nag-evacuate sa North Fairview High School bilang preparasyon sa posible nga pagbaha.
Suno sa mga otoridad, posible nga mag-evacuate ang tubtob 200 ka pamilya halin sa apat ka barangay sa Malabon kon magpadayon ang pagsaka sang tubig sa Tullahan River.
Ginaabisuhan ang mga residente sa malapit sa suba nga magpabilin nga alerto kag magsunod gilayon sa evacuation order kon kinahanglan.
