Nagpangayo sang pasaylo ang pila ka mga pumuluyo sang Barangay Libas, Roxas City sa ila ginpasimangdan nga nagkakas sa ila sa listahan para sa cash assistance.
Sa interview sang Bombo Radyo kay Maryvic Laquihon, iya ginpahayag nga nadala lang sila sa lukso sang ila balatyagon gani nakabuya sila sang indi maayo nga mga tinaga kay Regelyn Zabala nga isa ka Day-care worker.
Suno kay Laquihon, may kamatuoran nga yara ang ila nga mga pangalan sa listahan apang temporaryo ini nga gin-hold bangud may yara sang nagreklamo sa Department Of Social Welfare and Development (DSWD) kag gin-kwestyon ang pagkadala sang ila mga pangalan.
Pahayag pa niya, daku kuntani nga bulig ang makuha nila nga cash assistance ilabi na nga nagahilapit ang paskwa kag bag-ong tuig.
Matandaan nga una na sila nga nagpadulong sa istasyon sang Bombo Radyo Roxas agud nga ipabutyag ang ila nga hibubun-ot sa hinali nga pagkakas sang ila mga pangalan sa listahan sang mareleasan sang cash assistance.
Nagapangabay man ang natungdan nga mangin patas sa pagpili sang mga pumuluyo nga pagahatagan sang assistance nga matu-tuod gid nga naapektuhan sang nag-igo nga kalamidad.
