Hugot nga ginabantayan sang Pilipinas ang sitwasyon sa Venezuela matapos ang ginapahayag operasyon militar sang Estados Unidos nga nagresulta sa pagkaaresto kay President Nicolas Maduro, suno sa Department of Foreign Affairs (DFA).
Ginganyat sang DFA ang tanan nga partido nga magpakita sang paghalong kag ayuson ang mga indi paghangpanay sa malinong nga mga pamaagi agud nga malikawan ang mas malala nga away.
Ginsigurado man ang bulig para sa mga Pilipino sa Venezuela pamaagi sa Philippine Embassy sa Bogotá, nga nagpagwa sang travel kag safety advisory kag handa nga maghatag sang bulig kun ginakinahangan.
Gin-abisuhan man nga magpabilin nga alerto, hibaluon ang mga balita, kag magpreparar sang listahan sang emergency contacts ang mga Pilipino sa Venezuela. Sa subong, yara sa 74 ka mga Pilipino ang nabalhag sa amo nga pungsod.
Madumduman nga gin-anunsyo ni President Donald Trump sang Estados Unidos ang pagkaaresto kay Maduro kag sa iya nga asawa nga si Cilia Flores, kag gintawag ang operasyon bilang “madinalag-on,” samtang ginpanginwala ni Maduro ang mga alegasyon kag gin-akusaran ang Washington nga katuyuan sini nga kontrolon ang langis sang Venezuela.
