I-serve sang Pilipinas ang arrest warrant batuk kay Senator Ronald “Bato” dela Rosa kun mag-issue ang International Criminal Court (ICC).
Suno kay Prosecutor General Richard “Dong” Fadullon, nagapati siya nga kinahanglan nga mag-comply sang Pilipinas sa ICC.
Sang damlag lang, ginpahayag ni Ombudsman Jesus Crispin Remulla nga nag-issue sang arrest warrant ang ICC batuk kay Dela Rosa.
Ginpahayag naman ni Chief State Counsel Dennis Arvin Chan nga wala pa nakabaton ukon nakakita ang Department of Justice sang ICC warrant of arrest.
Apang kun matuod suno sa iya, mahimo nga ma-extradite ini sang Pilipinas kag ma-surrender si Dela Rosa sa International Criminal Court.
Dugang pa niya, seryoso nga ginatun-an sang gobyerno ang tanan nga options apang mas madasig ang pag-surrender kun ipaanggid sa extradition.
Una na nga nagpahayag si Atty. Israelito Torreon, counsel ni Dela Rosa, nga aware sila sa nagalapta nga mga reports tuhoy sa arrest warrant.
Base sa record sang gobyerno, ginabanta 6,200 drug suspects ang napatay sang tion sang anti-drug operations sang Duterte administration.
Apang suno sa Human rights organization, ang numero sang mga napatay ang naglab-ot sa 30,000 bangud sa mga unreported nga mga insidente.
Nahibaluan nga si Dela Rosa ang anay Chief sang Philippine National Police sang ginpatuman ang war on drugs.
