Ginsita ni Senador Win Gatchalian ang kakulangon sang masobra 7,000 special needs education (SNED) teachers sa isa ka hearing nga nagausisa sa pagpatuman sang inclusive education para sa mga learners with disabilities ukon estudyante nga may kasablagan sa lawas.
Sa amu nga hearing nahanungod sa oversight review sang Republic Act No. 11650 ukon ang ‘Instituting a Policy of Inclusion and Services for Learners with Disabilities in Support of Inclusive Education Act’, ginhatagan sang pagtamod ni Gatchalian ang kakulangon sang 7,651 SNED teachers sandig sa public school enrollment para sa School Year (SY) 2023-2024.
Sa karon, may ara lamang sang 5,147 nga SNED teachers, samtang naglab-ot sa 323,344 learners with disabilities nga may edad nga duha tubtob 17-anyos ang nag-enroll sadtong SY 2023-2024.
Kasunod sini, ginganyat ni Gatchalian ang Department of Education (DepEd) kag ang Commission on Higher Education (CHED) nga magbuligay agud masiguro ang pag-angkon sang mga kwalipikado nga SNED teachers.
Ginhimo nga institutionalized sang Republic Act No. 11650 ang policy of inclusion sa tanan nga pampubliko kag pribado nga early kag basic education schools. Mandato sa mga eskwelahan nga ini nga siguruhon ang equitable access sa dekalidad nga edukasyon para sa tanan nga mga estudyante nga may kasablagan sa lawas. Sa idalom sang layi, wala sang estudyante ang makitaan sang oportunidad nga makasulod sa isa ka bangud lamang sa iya nga kasablagan sa lawas.
Tinutuyo man sang layi nga hatagan sang training ang mga manunudlo kag school personnel sa pag-atipan kag edukasyon sang mga estudyante nga may kasablagan sa lawas. Ginamando sang layi sa DepEd nga makig-angut sa CHED agud masiguro nga ang mga programa nga bachelor of elementary ukon secondary education ang may mga kurso sa inclusive education.
Nakasaad man sa kasuguan ang pag-angkon sang scholarship program para sa mga in-service teachers nga magakuha sang mga kurso sa mga required master’s degree units sa special needs education, inclusive education, kag iban pa nga related courses. Kabaylo sini, kinahanglanon sang mga benepisyaryo sang programa nga nagtuman sang return service sa DepEd.
