Nagapanawagan ang Pilipinas sang pagkalma sa tensyon kag ginaganyat ang mga imbolbado nga bahin nga ipadayon ang diplomasya matapos gin-atake sang Estados Unidos ang mga nuclear site sang Iran sini nga weekend.
Ginpahayag sang Department of Foreign Affairs (DFA) nga ang pungsod, may daku nga numero sang mga mamumugon sa Middle East kag tuman nga nagakahangawa sa mga nagakatabo subong sa rehiyon.
May ginabanta nga 30,000 ka Pilipino nga caregiver sa Israel kag masobra 1,100 naman sa Iran. Isa ang Pilipinas sa mga nagapaguna nga pungsod sa pag-export sang labor force, may mas ukon menos 10 million nga workers nga skilled kag unskilled nga yara sa luwas sang pungsod, gani prone sila sa mga giyera, kinagamo, pagpang-abuso, kag indi makatarungan nga mga kondisyon sa pag-ubra.
Daku nga bahin sang kita sang pungsod sa foreign exchange ang gikan sa remittances sang mga OFW, nga naglab-ot sang masobra $35 billion kada tuig.
Nahibalun nga nagsugod ang pag-atake sang Israel sa Iran sadtong Hunyo 13, sa pag-akusar nga malapit na nga makahuman sang nuclear weapon ang ila madugay na nga kaaway.
Nagbalos naman ang Iran sang missile kag drone attacks batuk sa Israel, kag ginpanginwala ang akusasyon, ginapahayag nga ang ila nga nuclear program ang para lamang sa matawhay nga tinutuyo bilang miyembro sa international Non-Proliferation Treaty (NPT).
Indi miyembro ang Israel sa NPT kag ginapatihan nga nagaisahanon nga pungsod sa Middle East nga may nuclear weapons kag wala man ini ginkumpirma ukon ginpanginwala sang Israel.
Ginpahayag ni President Donald Trump nga “nawasak” sang US ang mga nagapanguna nga nuclear facilities sang Iran — Natanz, Isfahan kag Fordow — kag gintawag ang mga opensiba bilang “isa ka madinalag-on nga military operation.” Samtang, nagpromisa naman ang Iran nga mabalos sa pag-atake.
Sadtong Biyernes, gintaas sang gobyerno sang Pilipinas sa Alert Level 3 ang krisis sa Israel kag Iran, kag ginganyat ang mga Pilipino sa amo nga lugar nga mag-avail sang boluntaryo nga repatriation bangud sa nagalala nga tensyon sa tunga sang duha ka pungsod.
Suno sa mga opisyal sang Pilipinas, posible nga ipatuman ang force evacuations gikan sa Israel kag Iran kun magalala pa ang giyera.
Nakahanda man suno diri ang Armed Forces of the Philippines sa lapnagon nga repatriation sang mga Pilipino gikan sa mga delikado nga lugar.
Ginalantaw man sang Pilipinas ang mga alternatibo nga exit routes para sa mga Pilipino, kalakip ang Egypt kag Mediterranean Sea, magluwas sa Jordan, suno pa sa mga opisyal.
Suno kay Department of Migrant Workers Secretary Hans Cacdac, kadam-an sa mga Pilipino nga mamumugon kag residente sa Israel kag Iran ang ginpili nga magpabilin sa pihak sang missile attacks sa tunga sang duha ka pungsod.
Posible man nga magtaas ang numero sang mga Pilipino nga magapangayo sang bulig sa gobyerno para sa repatriation kasunod sang pag-intra sang US sa giyera, nga ginalauman nga magapalala pa sang tensyon sa rehiyon.
Yara na sa 223 ka Pilipino ang nakapalista para sa repatriation gikan sa Israel, kalakip ang isa ka grupo nga 26 ka indibiwal nga luwas nga nakatabok padulong sa Jordan.
Gintugutan ang mga ini nga magpabilin didto sang tubtob 72 oras agud maka-book sang komersyal nga flight pauli sang Maynila.
Ginalauman man nga magaabot ang mga ini sa Maynila sa buwas nga adlaw, Martes, suno kay Cacdac. May walo ka Pilipino ang napilasan sa Israel bangud sa missile attack sang Iran, apang pito sa ila ang nakaguwa na sang ospital.
Ang isa nga una na nga na-report nga malala ang kahimtangan, ang yara na sa stable nga kondisyon suno sa mga opisyal sang embahada sang Pilipinas.
Samtang, nakahanda ang mga embahada sang Pilipinas sa rehiyon nga maghatag sang kinahanglanon nga bulig sa mga Pilipino sa ila nga nasakupan, suno sa DFA.
