Nagapanguna ang Pilipinas sa listahan sang mga pungsod nga naka-eksperyensya sang pinakadaku nga pagtaas sang presyo sang langis humalin sang nagluntad ang tensyon sa Iran sang Pebrero 23, 2026.
Base sa data sang Global Petrol Prices, nagtaas sang 81.6% ang presyo sang diesel sa pungsod subong nga Marso nga pinakamataas sa bug-os nga kalibutan.
Ang Nigeria nagsunod nga may 78.3% kag ang Malaysia nga may 57.9% nga pagtaas.
Samtang, mas manubo ang narekord sa mga pungsod pareho sang Japan (14.0%) kag South Korea (15.1%), samtang ang mga presyo nagpabilin nga wala nagbag-o sa India kag Saudi Arabia.
Ginapakita sang data nga mas grabe ang epekto sang pangkalibutanon nga krisis sa merkado sang langissa mga pungsod sa Asya, ilabi na sa Pilipinas nga tuman nga nagasalig sa imported supplies.
Magluwas sini, ang padayon nga pagnubo sang balor sang piso nga nagnubo sa P60.23 kada dolyar ang nagpalala sang palas-anon sang presyo sang langis nga mas ginabatyag subong sang mga konsumidor kag mga negosyo sa ila matag-adlaw nga operasyon.
Ini nga sitwasyon pamatuod sang mabug-at nga hangkat nga ginapangatubang sang pungsod sa tunga sang pangkalibutanon nga kinagamo, nga nagabutang sang mas mabug-at nga palas-anon sa ekonomiya kag palangabuhian sang mga Pilipino.
