Lubos kag wala nagaduha-duha nga ginasuportahan sang Pilipinas ang resolusyon sang United Nations nga nagapanawagan sang gilayon, wala sang kondisyon kag permanente nga ceasefire sang inaway sa Gaza.
Kaangot sini, isa ang Pilipinas sa 149 ka mga pungsod nga nagboto pabor sa resolusyon, 12 ang nagpamatok samtang 12 ang nag-abstain.
Kalakip sa mga pungsod nga nagpamatok amo ang Estados Unidos, Argentina, Hungary, Paraguay kag Israel nga nagapadayon sang opensiba sa Gaza nga ginapatihan palanaguan sang mga militante sang Hamas.
Sa resolusyon nga gin-adoptar sang UN General Assembly, hugot nga ginpakamalaut sini ang bisan ano nga sahi sang paggutom sa mga sibilyan bilang isa ka pamaagi sang inaway kag ang indi makatarunganon nga pagdumili sang humanitarian access sa Gaza.
Ang General Assembly nagsiling man nga sa idalom sang internasyonal nga kasuguan, ang Israel obligado sa pagsiguro nga ang humanitarian aid makalab-ot sa tanan nga mga tawo nga nagakinahanglan sa Gaza kag nagdemanda sang gilayon kag permanente nga paghatag sang luwas kag wala sing sablag nga mga entry point para sa mga balaklon sa bug-os nga Gaza.
Ginpangayo man liwat ang gilayon kag wala sing kondisyon nga paghilway sa tanan nga nabilin nga mga bilanggo sang Hamas kag iban pa nga mga grupo.
