ROXAS CITY – Nabutang karon sa kontrobersiya ang plano sang gobyerno probinsiyal nga magpatigayon sang Strategic Planning seminar kag Executive Legislative Agenda (ELA) sa Davao sa maabot nga Oktubre 15-18, 2019.
Kalakip sa magapadulong sa Davao para sa nasambit nga seminar ang mga department heads sang kapitolyo probinsiyal kag mga board members.
Maga-convene sa amo nga aktibidad ang natungdan nga mga opisyales sang gobyerno probinsiyal kag talakayon ang pondo sang probinsiya.
Apang matapos nagguwa ang impormasyon nga pagakuhaon sa pondo sang mga board members ang kagastuhanan sa ila nga pagbiyahe, madamo ang nagpamalibad nga mag-upod.
Bangud diri, plano ni Governor Contreras nga magpa-realign sang pondo agud gamiton sa tranportation expenses sang magaupod nga katapu sang provincial board.
Sa pagpangusisa sang Bombo Radyo nagaguwa nga kalakip sa tinutuyo sang pagapadulong sa Davao agud mabisita si Mayor Sara Duterte kag Congressman Paolo Duterte, matun-an ang implementasyon sang 6K development agenda sang Davao nga posible ma-apply sa probinsiya sang Capiz kag ang pagpadulong sa Samal Island.
Samtang ginaalegar nga indi mag-upod sa Davao sanday Board Members Ricky Martin, Thea Faith Reyes, PCL President kag Ex Officio Member Mitch Patricio kag Vice Governor James ‘’Mitang’’ Magbanua./
