Gin-anunsyo sang Philippine National Police (PNP) kahapon nga adlaw nga nakatutok sila sa pag-usisa kag pagkuha sang mga ebidensya may kaangtanan sa kamatayon sang anay Department of Public Works and Highways (DPWH) undersecretary Maria Catalina Cabral, matapos nasapwan ang iya bangkay sa Benguet.
Suno kay PNP Acting Chief Police Lt. Jose Nartatez Jr., gina-interrogate nila ang driver ni Cabral matapos ginbayaan sini ang anay opisyal sang DPWH sadtong Huwebes sa Kennon Road sa Tuba, Benguet, base sa hingyo sang nasambit nga opisyal.
Dugang pa ni Nartatez, subong nga nakumpirmar na ang kamatayon ni Cabral, ang masunod nila nga himuon amo nga hibaluon kun ano gid ang natabo.
Pahayag pa niya, nagakoordinar man ang PNP sa Independent Commission for Infrastructure (ICI) kag iban pa nga mga natungdan nga ahensya agud matumod ang mga ebidensiya nga kinahanglan nga makuha may kaangtanan sa imbestigasyon sa mga flood control projects.
Agud malikawan ang mga lapses, ginmando ni Nartatez ang mas hugot nga superbisyon sa mga local police units nga naga-uyat sang kaso ni Cabral, kasunod sang pag-relieve sa puwesto sang Hepe sa Tuba, Benguet Police.
