Pabaskugon pa sang Philippine National Police (PNP) ang ila nga police visibility sa mga eskwelahan kag mga lugar nga posible mangin target sang kidnapping incidents.
Sa karon nakig-angut na ang PNP sa mga eskwelahan sa Metro Manila, partikular sa mga international school, agud mas pasanyugon pa ang seguridad.
Pahayag ini ni PNP Anti Kidnapping Group Director Col. Elmer Ragay, kasunod sang insidente sang pagkidnap sa isa ka estudyante sang isa ka international school sa Taguig City, nga gin-utdan sang tudlo sang kidnappers.
Ginpahayag ni Col. Ragay, pasanyugon sang PNP ang ila nga information dissemination pinaagi sa pagpanagtag sang mga materyales ukon impormasyon kontra kidnapping, may yara man sila sang mobile team nga posible i-tap agud maghiwat sang lecture kaangut sa safety tips.
Suno naman kay NCRPO Director PBGen. Anthony Aberin, ginapasanyog na nila ang ila nga presensya sa mga lugar nga posible magluntad ang kasubong nga krimen.
Samtang ginpasanyog naman nila ang ila kampaniya sa social media, kontra kidnapping.
Ginhinyo man sang PNP sa publiko nga mangin alerto sa palibot.
