ROXAS CITY – Manageable kag wala pa sang may na monitor ang kapulisan nga ‘intense political rivalry’ nga nagakahinabo sa probinsya sang Capiz.
Ini ang ginpahayag ni PCol. Jerome Afuyog Jr, Acting Provincial Director sang Capiz Police Provincial Office (CPPO) sang mainterview sang Bombo Radyo.
Pahayag sini, nga kun pagabasehan ang record, wala sang pulitiko sa probinsya nga ginpatay ang kaangay man nga pulitiko.
Apang suno kay Afuyog, indi ini rason agud magpakampante ang hanay sang kapulisan ilabi na nga asud-asud ang nagakahinabo nga pagpatay sa mga elected government officials sa pungsod kun sa diin ang pinakaulihi amu ang pagpatay kay Negros Oriental Gov. Roel Degamo nga ginkaulamiran pa sang 8 pa gid ka mga sibilyan sang ginsulod sang mga armado nga grupo ang compound mismo sang gobernador sang tinalikdan nga Marso 4.
Suno diri, wala pa sang local chief executives ang nagpangayo sang assistance sa kapulisan apang handa sa gihapon maghatag sang seguridad ang PNP pinaagi sa pag-secure sa dalan kag mga lugar nga pagapadulongan sang public officials.
Samtang, personal naman ginpadulongan ni Afuyog ang banwa sang Pilar kag President Roxas agud makighinala sa mga alkalde angut sa natabo nga political rivalry sang madugay na nga panahon ilabi na nga nagahilapit na ang Barangay kag SK elections.
