ROXAS CITY– Mainit nga ginsug-alaw sang mga nagahulat nga mga OFWs sa Abu Dhabi Presidential airport ang pag-abot sang Santo Papa.
Sa exclusive interview sang Bombo Radyo Roxas kay Bombo International correspondent Luis Salcedo, ginpahayag sini nga nalipay ang mga Pinoy sang makita nga naglanding ang eroplano nga ginasakyan ni Pope Francis sa nasambit nga airport.
Sa pihak nga indi makapalapit ang mga OFWs kay Pope Francis bangud sa hugot nga seguridad, apang malipayon kag kuntento na sila sa pagwave san kamot sang Santo Papa.
Ginabantayan naman sang mga OFWs ang pinakauna nga papal mass nga pangunahan sang Santo Papa sa Arabian Peninsula sa adlaw sang Martes.
Ginabulubanta nga tambongan ang nasambit nga misa ni Pope Francis sang kapin 120,000 ka tawo nga gikan sa magkatuhay nga rasa.
Samtang, matapos ang welcome ceremony para kay Pope Francis sa Presidential Palace, natalana ini nga makigkita sa mga katapo sang Muslim Council of the elders sa Grand Mosque sang Sheik Zayed.
