ROXAS CITY – Ginpakigbahin sang isa ka pageant expert sa Capiz ang posible pila sa mga rason nga wala nalakip ang kandidata sang Pilipinas nga si Celeste Cortesi sa bag-o gid lamang nagtakop nga Miss Universe 2022.
Sa interview sang Bombo Radyo kay Mr. Angelo Blancaver, ginsiling sini nga tuman nga nag-ekspektar ang mga Filipino nga malakip sa Top finals si Cortesi, bangud sa sulod sang 12 ka tuig may yara gin sang puwesto ang aton kandidata, subong man, wala sang kuwestyon sa katahum ni Cortesi kag ‘big deal’ sa mga ‘Pinoy’ ang beauty pageant, rason nga naintindihan niya kun amu nalang ang reaksyon sang mga tumalan-aw nga Filipino, kahapon nga adlaw sa kapaslawan ni Cortesi.
Indi naman kuntani pagbasulon ang Miss Universe organizers bangud tanan man nga mga kandidata ang mga matahum kag makita nga ginhatag nila ang ila masarangan para sa korona.
Dugang pa ni Blancaver nga wala sang basehan ang gingamit nga Darna costume ni Cortesi bangud sa iya pagkahibalo ang preliminary competition ang gina-compose sang evening gown kag swimsuit competition kag nag nabilin nga 60% amu ang closed door interview.
Gani, para sa iya, posible bangud bag-o na ang tag-iya sang Miss Universe pageant nga isa ka transgender Thai nga si Anne Chakrajutathib, may mga ginapangita nga wala lamang nila nakita kay Cortesi, sa baylo, kay Miss USA kag ginkoronahan nga Miss Universe 2022 R’Bonney Gabriel, nga isa man ka half Fiilipina, nila ini nakita, bangud sa iya adbokasiya.
Sa pihak nga bahin, ginhingadlan ni Blancaver ang ginalantaw nga mangin pambato sang Capiz sa palaabuton nga Miss Universe 2023, sa pagkatawo ni Shayne Maquiran, maanyag kag maalam, former mutya sang Roxas, nag on-the-job training sa US, kag kuntani suportahan man sang mga Capiznon.
