Nakahanda si President Roxas, Capiz ,Mayor Receliste “Tanoy” Escolin sa proseso sang kaso nga iya ginapangatubang.
Ini kasunod sang mando sang Commission on Elections en banc nga natalana sang in-person hearing sa Mayo 27, 2026 may kaangtanan sa Special Action case.
Sa interview sang Bombo Radyo kay Mayor Escolin, iya ginpahayag nga hulaton kag respetuhon niya ang mangin pinal nga desisyon sang korte.
Suno pa sa alkalde, nagapati siya nga wala siya sang nalapas nga pagsulundan kag insakto ang iya pagdalagan bilang mayor.
Ginpasiguro man niya nga indi masayang ang boto sang mga pumuluyo kag padayon ang iya matutom nga pagserbisyo sa banwa.
Nagpanawagan man ini sa publiko nga basahon kag intindihon anay ang opisyal nga order kag indi magpati gilayon sa wala pa mapamatud-an nga impormasyon.
Nahibaluan nga nag-ugat ang kaso sa ginpasaka nga petisyon sa COMELEC nanday anay Punong Barangay Richard Baltar kag Arnulfo Degala bangud sa alegasyon nga naglapas ini sa three-term limit matapos siya liwat nga nag-kandidato sa ikaapat nga kahigayunan.
