Ginpaidalom sa lifestyle check sang National Bureau of Investigation ukon NBI Central Office si Capiz Gov. Antonio del Rosario.
Sa interview sang Bombo Radyo Roxas kay Del Rosario nga may nagpalab-ot sang reklamo batuk sa iya sa Office of the President may kaangatanan sa gina-alegar pagkadalahig sini sa illegal nga aktibidad rason sang imbestigasyon.
Kadungan sini, ginkumpirmar sang gobernador nga nagpadulong sa Capiz Provincial Capitol ang mga tinawo sang NBI Central Office kag nagpahibalo sa iya sa patigayunon nga lifestyle check.
Suno pa sa gobernador nga kalakip sa ginreklamo batuk sa iya amo ang korapsiyon sa kapitolyo probinsiyal, ang pagpahamtang niya sa magkatuhay nga posisyon sa gobyerno sang mga miyembro sang iya pamilya, bilang protector sang ginapahayag illegal nga droga kag ang kwestyunable nga ginhalinan sang iya mga propedad kag madamo pa.
Nahibaluan man gikan sa opisyal nga nagpadulong man sa iya balay ang mga ahente sang NBI kag nagkuha sang mga laragway ang mga ini.
Aminado naman si Gov. Del Rosario nga madugay na suni nga ginalauman nga ipaidalom siya sa lifestyle check sang subong nga administrasyon bangud kilala ini nga tampad nga miyembro sang Liberal Party sa Capiz.
