Gin-aprubahan sang House Committee on Appropriations nga ginapangunahan ni Rep. Mikaela Suansing ang substitute bill nga magahimo sang kasuguan sang Presidential Merit Scholarship Program (PMSP).
Ang nasambit nga hagna ang isa ka prayoridad sa idalom sang agenda sang Legislative-Executive Development Advisory Council (LEDAC) ni President Ferdinand “Bongbong” Marcos Jr.
Para sa Academic Year 2026–2027, ang Commission on Higher Education (CHED) nag-alokar sang masobra ₱600 milyon agud makabenepisyo ang ginabanta 20,000 ka mga graduating students sa idalom sang Bagong Pilipinas Merit Scholarship.
Tinutuyo sang hagna nga masiguro ang padayon nga pagpatuman sang programa paagi sa isa ka solido nga legal framework para sa merit-based nga suporta sa publiko kag pribado nga mga institusyon sang mas mataas nga edukasyon.
Sa idalum sang hagna, ang programa igabutang sa idalom sang CHED kag magahatag sang komprehensibo nga bulig pinansyal lakip na ang libre nga tuition kag iban pa nga balayran, allowance para sa mga libro, kagamitan kag internet, uniporme ukon clothing allowance, dormitoryo ukon transportasyon, kag iban pa nga gasto sa pagpangabuhi.
Ginrekomenda man sini ang pagdugang sang tuigan nga grant halin sa ₱20,000 tubtob ₱90,000 para sa mga iskolar sa pribado nga mga institusyon kag ₱45,000 para sa mga yara sa pampubliko nga mga eskwelahan.
Ang pondo para sa una nga tuig sang implementasyon pagakuhaon gikan sa sa subong nga appropriations sang CHED, samtang ang masunod nga mga pundo igalakip sa tuigan nga General Appropriations Act.
Sa subong natalana nga i-sumite sa plenaryo ang hagna para sa dugang nga deliberasyon.
