Nag-resign si Prime Minister Khadga Prasad Oli matapos nagluntad ang magamo nga hublag-protesta bangud sa pagdumili sa mga social media platforms kag padayon nga isyu sang korapsyon sa gobyerno.
Ang nasambit nga pagbuya sa pwesto ang kasunod sang insidente sa diin 19 ka-tawo ang napatay matapos nga ginpangluthang sang mga pulis ang mga protesters sa Kathmandu.
Lakip sa mga ginsunog sang mga akig nga nag-protesta ang balay ni Presidente Ram Chandra Poudel. Nasunog man ang mga propedad nanday Sher Bahadur Deuba, pinuno sang pinakadako nga partido sa Nepali Congress; Home Minister Ramesh Lekhak; kag Pushpa Kamal Dahal, lider sang Communist Party of Nepal.
Ginakabig sang mga pumuluyo sang Nepal nga pag-utas sa freedom of speech ang pagdumili sa paggamit sang social media platforms.
Sa subong, nagapabilin nga tensyonado ang sitwasyon sa pungsod samtang ginahulat ang posible nga transisyon sa pagpamuno kag ang sabat sang gobyerno sa malapnagon nga panawagan para sa reporma.
