Ginpabaskog pa sang Police Regional Office 6 ukon PRO-6 ang kampanya kontra sa mga iligal kag wala sang lisensya ukon indi rehistrado nga mga armas luthang sa idalom sang Project RTT ukon Restrict, Track, and Turn-in.
Sa interview sang Bombo Radyo kay Police Major Lailyn Sencil, spokesperson sang PRO-6, iya ginpahayag nga halin Setyembre 1 tubtob 8, naglab-ot na sa 190 ka mga loose firearms ang na-recover sang mga kapulisan sa Western Visayas.
Suno kay Sencil, anum sa mga armas ang na-confiscate sa mga police operations, samtang 170 ang boluntaryo nga ginsurrender sa kapulisan kag 14 naman ang gindeposito para sa pag-renew sang lisensya.
Nagapabilin nga prayoridad sang kapulisan ang padayon nga pag-monitor sang mga expired nga lisensya, ukon wala na rehistro nga armas agud mapabilin ang seguridad kag kalinong sa rehiyon.
