SAPIAN, CAPIZ – Ginkilala ang mga programa, estratehiya kag dedikasyon sang Sapian Municipal Police Station sa pagserbisyo publiko matapos ini makabaton sang Silver Eagle Award.
Sa interview sang Bombo Radyo kay Police Lieutenant Steve Ian H Bautista, Officer-in-Charge sang Sapian Municipal Police Station, iya ginpahayag nga daku ang ila kalipay, bugal kag pagpasalamat sa Ginoo sa pagkabaton sang amo nga award, nga nagapakita sang ila sakripisyo kag hugot nga dedikasyon sa pagserbisyo.
Suno kay Bautista, lakip sa mga best practices nga ila ginapatuman amo ang Tatak SMPS, Bula Kontra Droga, Project Watchmen, Project CAPeace-Tawhayan kag Project RTT 3389, nga nagabulig sa pagpalig-on sang seguridad kag pagserbisyo sang ila police station.
Pahayag pa niya, ginapasiguro sang Sapian MPS ang maayo nga pagserbisyo paagi sa pagpatuman sang disiplina sa mga personnel, regular nga pagpatigayon sang mga pulong-pulong kag pagmonitor agud mapabilin ang mataas nga moral sang mga kapulisan, kag pagpakig-angot sa mga pumuluyo, opisyal sang barangay kag iban pa nga ahensya sang gobyerno.
Dugang pa sa impormasyon indi man nangin mahapos bangud sa may yara sila nga ginaatubang nga limitado nga logistical resources kag ang pagbalanse sang adlaw-adlaw nga operasyon sa pagpatuman sang mga reporma kag kinahanglanon nga dokumentasyon para sa Performance Governance System ukon PGS, apang, nalampasan nila ini paagi sa pagbinuligay, maayo nga pagpamuno kag pag-uyon sang mga personnel sa ila mga katuyuan.
Sa karon, ginapasalamatan sang Sapian MPS ang suporta sang lokal nga panguluhan sang banwa, mga punong barangay kag mga pumuluyo nga naghatag sang pagsalig sa ila police station. Ginapangabay man nila ang padayon nga kooperasyon sang komunidad paagi sa gilayon nga pagpaabot sang mga impormasyon kag concern sa ila talatapan agud mapabilin ang kahilwayan kag katawhay sa banwa sang Sapian, Capiz.
