Ginlunsyar sang 1st Capiz Provincial Mobile Force Company (CPMFC) ang Project AMOMA (Aton Mangunguma, Mangigisda kag Mamumugon Organisahon Manggad nga Dapat Amligan), isa ka komprehensibo nga programa nga nagatuyo sa pagpakig-away sa kriminalidad, terorismo, kag pagpasanyog sang socio-economic development sa marginalized areas sang probinsya sang Capiz.
Sa interview sang Bombo Radyo kay PCOL Albert Tapulao, Provincial Director sang Capiz PPO, ginpahayag sini nga ang ini nga proyekto ang nagatutok sa paghatag sang bulig sa mga komunidad sa 43 ka mga kabarangayan nga anay apektado sang CTG sa mga munisipalidad sang probinsya, lakip na ang Roxas City, Maayon, Pontevedra, Pres. Roxas, kag Pilar.
Kalakip man sa pagatutukan sa sini nga proyekto ang pagbulig sa mga mangunguma kag tripulante sa probinsya.
Ang ini nga inisyatibo ang ginakabig bilang nagasabat sa mga isyu kaangay sang kadulaan sang trabaho, pagbuhin sang kaimulon, kag seguridad.
Ang 1st Capiz Provincial Mobile Force Company (CPMFC), kaupod sang Philippine Army, nagpadala sang mga dedikado nga grupo agud untatan ang istruktura pulitikal sang mga CTG samtang nagahatag man ini sang mga programa bilang suporta sa komunidad.
Nagahatag man ang Project AMOMA sang importansya sa pag-atipan nga nagapasanyog sang pag-uswag, kalig-on, kag paghiliusa sa mga apektado nga mga lugar sa bilog nga probinsya sang Capiz.
