Ginpahayag ni House Prosecutor kag Bicol Saro Party-list Representative Terry Ridon nga may yara sila sang bag-o nga ebidensya batok kay Vice President Sara Duterte may kaangtanan sa mga propiedad sini kag sang iya bana nga wala kuno nadeklarar sa ila Statement of Assets, Liabilities, and Net Worth (SALN) halin sang 2007 tubtob 2024.
Sa paglunsar sang “Bantay Impeachment” sa Claret School, ginsiling ni Ridon nga nakarehistro ang mga nasambit nga propiedad sa nagkalain-lain nga ahensya sang gobyerno apang wala ini nagguwa sa mga SALN nga ginpasaka sang Bise Presidente.
Suno sa iya, gamiton ang bag-o nga ebidensya agud mapamatud-an ang reklamo may kaangtanan sa “unexplained wealth” ukon wala maathag nga pagkabutang sang manggad, nga isa sa apat ka reklamo nga ginaatubang ni Duterte.
Ginpahayag man ni Ridon nga wala nahisugtan ang mga dokumento sa nagligad nga mga hearing sa Kamara, gani ginakabig ini nga bag-o nga ebidensya kag pormal nga iga-upod sa pretrial brief nga isumiter sa Senado sa masunod nga semana.
Dugang pa niya, wala sang layi nga nagadumili sa prosekusyon nga magsumiter sang bag-o nga ebidensya antes matapos ang pretrial stage.
Gindayaw man ni Ridon si House Prosecutor Joel Chua nga amo ang nakadiskubre sang nasambit nga mga bag-o nga ebidensya.
Luwas sa reklamo nga may kaangtanan sa “unexplained wealth,” ginaatubang man ni Vice President Duterte ang mga reklamo sang korapsyon, indi husto nga paggamit sang pondo sang gobyerno, kag ginapatihan nga pagpamahog sa kabuhi sang mga mataas nga opisyal sang pungsod.
