ROXAS CITY -Padayon ang ginapatigayon nga contact tracing sang provincial government sa mga indibidwal nga nakaupod sang 10 ka mga Capizeño nga nagpositibo sa COVID-19 sa Capiz.
Ini ang ginpasalig ni Capiz Governor Esteban Evan Nonoy Contreras sang mainterview sang Bombo Radyo.
Ginpahayag ni Contreras nga nag mando na ini sa mga Municipal Health Officers nga gilayon nga magpatigayon sang contact tracing sa mga inidbidwal nga posible na close contact sang 10 ka mga nagpositibo.
Suno kay Contreras nga asymptomatic ang 10 ka mga nagpositibo nga Capizeño apang ginpakamaayo na lamang nga dal-on sa Roxas Memorial Provincial Hospital agud masiguro ang ila kondisyon.
Dugang pa sang gobernador nga ipaidalum sa RT-PCR test ang mga himata sang mga nagpositibo kun nalatnan sila ukon wala sang nasambit nga virus.
Samtang, pagahinalaan pa sang Provincial Inter-Agency Task Force ang pagpapauli sang mga Locally Stranded Individuals ukon LSI’s kag mga OFW repatriates sa probinsiya kasunod sang pagpositibo sang 10 ka mga indibidwal.
Nagpangabay man si Contreras sa mga pumuluyo nga magkooperar agud mangin madasig ang contact tracing kag malikawan ang pagdamo sang nasambit nga balatian.
Matandaan nga 10 ka mga Capizeño ang nagpositibo sa COVID-19 kahapon nga adlaw kun sa diin 7 diri ang Locally Stranded Individuals kag 3 ka mga OFW repatriates.
Sandig sa datos sang Department of Health sa mga nagpositibo, 3 ang taga banwa sang Jamindan, 2 sa Dumalag, 2 sa Pontevedra, kag tig isa naman sa banwa sang Pilar, President Roxas kag Roxas City.
