ROXAS CITY – Nangin madinalag-on ang una nga adlaw sa ginhiwat nga Public Health Forum sa banwa sang Pilar, President Roxas kag Maayon kahapon nga adlaw sa pagpanguna sang Public Health Office- Capiz sa idalum sang pagpamuno ni Mr. Ramon Alex Nolasco.
Sa interview sang Bombo Radyo kay Mr. Ayr Altavaz, Supervising Administrative Officer kag PIO sang Capiz PHO, ginsiling sini nga pagalibuton nila ang kabanwahanan sa probinsya nga amu ang ginmandu ni Governor Fredinil Castro.
Ang nasambit nga forum ang may tinutuyo nga maghiwat sang aktibidades sang tagsa ka banwa agud matapna ang makalalapon nga balatian kun sa diin padayon nga nagaduging kasubong sang covid nga nagataas naman ang kaso, dengue nga ginaekspektar magadamo ang kaso subong nga tuig, monkeypox nga sarang makahalit sa komunidad kag yara na sa kaiping nga mga pungsod kag iban pa nga isyu nahanugod sa sa ikaayong lawas.
Suno kay Altavaz, co-sponsored sang nasambit nga forum ang 17 ka LGU kun sa diin kinahanglan matapos ang paglibot sa kabanwahanan sa sulod sang 6 ka adlaw agud gilayon maaksyunan ang pagtapna sa mga balatian pinaagi sa mga plano kag estratehiya ng iga-implementar sang PHO.
Subong nga adlaw pagakadtuan nila ang banwa sang Panay, Pontevedra, kag Panit-an, sa Hulyo 15 naman ang banwa sang Tapaz, Dumalag, kag Dao, sa Hulyo 18 ang Dumarao, Cuartero kag Jamindan, sa Hulyo 19 ang Mambusao, Sigma kag Sapian, magatakup ang public health forum caravan sa Hulyo 20 sa Ivisan kag syudad sa Roxas.
Luyag man ipalab-ot ni Altavaz handa sila maghatag sang serbisyo kaupod ang partner stakeholders, ilabi na si Gov. Castro agud mapasangkad ang sektor sang ikaayong lawas sang tagsa ka Capizeno.
