ROXAS CITY – Padayon sa karon nga ginabulong sa ospital ang isa ka pulis matapos aksidente nga natiruhan sang iya kaupod man nga pulis sa ila nga billeting area sa Capiz National High School.
Ginkilala ang natiruhan nga biktima kay Patrolman Leonil Castro, 24 anyos kag assigned sa Sara Municipal Police Station samtang ang nakatiro naman ang ginkilala kay Jasthine Maestral, 26 anyos kag assigned naman sa Barotac Nuevo Municipal Police Station.
Sa inisyal nga impormasyon nga nakuha sang Bombo Radyo News Team, samtang nagapahuway ang biktima sa duyan, nagapanghimos naman si Maestral bangud natalana sila nga magpadulong sa ila nga deployment area.
Apang ginapahayag nga aksidente nga napitik ni Maestral ang gatilyo sang iya personal nga armas rason nga naigu sa tiyan ang nagapahuway nga si Castro.
Bangud diri, gilayon nga gindala sa ospital ang biktima agud madapatan sang nagakaigo nga pagbulong.
Personal naman nga ginsungka ni Maestral ang iya armas sa Roxas City Police Station.
Mahibaluan nga ang duha ka pulis ang lunsay miyembro sang augmentation force sang Police Regional Office (PRO6) sa selebrasyon sang charter anniversary sang probinsiya sang Capiz nga Capiztahan.
