ROXAS CITY, CAPIZ- Pilason ang isa ka pulis sa syudad sang Roxas matapos nga ginbuno sang hubog sa Sitio Sumiga, Barangay Milibili, Roxas City.
Ang nasambit nga pulis amo si Police Corporal Kim Alvin Torres, 34-anyos, samtang ang hubog amo si Jerry Higo, 41-anyos kag lunsay residente sang nasambit nga lugar.
Sa interview sang Bombo Radyo kay Police Lieutenant Colonel Ricardo Jomuad Jr., Hepe sang Roxas City Component Police Station, iya ginpahayag nga samtang nagbakal si Torres sa isa ka tyangge upod ang iya nga abyan, nag-abot ang suspek kag iya man sini kaupod.
Suno kay Jomuad, tion nga mapuli na kuntani si Torres kag sang iya nga abyan, hinali nalang nga ginbuno ni Higo ang amo nga pulis. Bangud sini, nagdalagan papuli ang pulis kag nagpangayo sang bulig sa iya nga asawa sa diin nga gindaw-an ini sya sang pusil apang indi sini luyag nga luthangon ang amo nga hubog.
Liwat nga naghana sang pagpangbuno ang hubog, apang sa kaugalingon nya ini nag-igo bangud nga nabaslan ini sang pulis.
Gilayon nga ginpadangat sa magkatuhay nga ospital ang tagsa ka bahin apang, samtang ginabulong ang suspek, ginbawian ini sang kabuhi.
Nagakoordinar na sa karon ang mga kapulisan sa tagsa ka bahin para sa nagakaigo nga disposisyon.
Interviewed by Bombo Jessa Mae Siman De Los Santos
