PILAR, CAPIZ- Totally burned ang isa ka puluy-an matapos ang nagluntad nga sunog sa Sitio Riverside, Barangay Rosario, Pilar, Capiz.
Ang puluy-an ang ginapanag-iyahan ni Agnes Atchina kag nagapang-edaron sang 51.
Sa interview sang Bombo Radyo kay Fire Officer 2 Joenel Cereneo, Imbestigador sang Bureau of Fire Protection-Pilar, iya ginpahayag nga sang natabo ang sunog, duha ka Senior Citizen ang yara sa puluy-an.
Suno kay Cereneo, ang tag-iya sang balay kag ang bata sini yara sa bilasyunan.
Pahayag niya, sandig sa panaysayon sang bata sang tag-iya, kandila nga nakasindi ang gintunaan sang amo nga sunog.
Nag-umpisa ang sunog takna las 3:30 sang kaagahon kag gindeklara nga fireout takna las 4:40 sang aga.
Nahibaluan nga human sa mixed materials (light & concrete) ang nasambit nga puluy-an kag nautdan ini sang kuryente rason nga naggamit sila sang kandila.
Ginabulubanta naglab-ot sa mas ukon menos P30,000 ang balor sang halit nga ginbilin sang amo nga sunog apang sandig ini estimate per square meter sang BFP.
Nagapanawagan naman ang natungdan sa publiko nga maghalong sa tanan nga mga pagkabutang nga makatuga sang kalayo, agud malikawan ang sunog.
Interviewed by Bombo Sunnie Mae Constantino Batencila
