Ginreklamo sang mga katapo sang City Disaster Risk Reduction and Management Office (CDRRMO) ang Punong Barangay sang Barangay Inzo Arnaldo Village matapos nga ginaalegar nga ginkuha sini sa quarantine facility ang isa ka babayi nga Locally Stranded Individual (LSI) nga wala sang nakaigo nga permiso sa mga otoridad sa Congressman Ramon A. Arnaldo High School sa Barangay Banica,Roxas City.//
Sandig sa incident report nga ginpadala ni Mr. Gilbert Fernando, Camp Logistics kag Admin-Designate sang CDRRMO sa kay Mr. Ruel Bergantino, Camp Manager-Designate sa amo nga quarantine facility nga ginkuha ni Punong Barangay Einstein Okpora ang naka-quarantine nga LSI nga residente sang Barangay Inzo Arnaldo Village sining siyudad.//
Suno sa kay Fernando nga gin-pull out ni Okpora ang nasambit nga LSI sa nasambit nga quarantine facility nga wala sang permiso gikan sa mga otoridad.//
Gindugang pa sini nga naglisensya man ini sa kay Ms. Nema Lozada sang CDRRMO nga paguwaon sini sa quarantine facility ang nasambit nga LSI apang wala ini ginpasugtan bangud ginapaidalom sa 14-day facility quarantine ang nasambit nga LSI.//
Ginkakibot na gid lamang sang mga katapo sang CDRRMO nga wala na ang LSI sa quarantine facility kag ginaalegar nga ginkuha ni Okpora.
Nakabaton naman sang impormasyon ang talatapan sang CDRRMO nga ginpapauli ni Okpora ang nasambit nga LSI sa ila nga ginadayunan nga apartment agud ipaidalom sa home quarantine apang ginakahangaw-an sang CDRRMO bangud ang lola sang nasambit nga LSI ang bag-o gid lamang ginbawian sang kabuhi sang tinalikdan nga Oktubre 2 matapos nga nagpositibo sa COVID-19.
Ginapanindugan sang talatapan sang CDRRMO indi mahimo nga ipaidalom sa home quarantine ang nasambit nga LSI.
Mahibaluan nga magluwas sa nasambit nga LSI, may sang isa pa ka lalaki nga LSI nga nagpalagyo sa nasambit nga quarantine facility.
