ROXAS CITY – Ginklaro ni Punong Barangay Anita A. Bitoon sang Barangay Tanque nga indi compulsory kag voluntary ang ila pagpanukot sang P100.00 para sa pagkolekta sang basura sa ila barangay.
Sa interview sang Bombo Radyo kay Punong Barangay Bitoon, ginpahayag sini nga madugay na ini nga gin-aprubahan sa konseho apang sadtong Abril lamang sila nagsugod sa pagpanukot.
Suno pa diri nga ang nasambit nga kwarta ang pagagamiton agud ibakal sang gasolina, sweldo sang driver sang truck kag maintenance sini.
Matandaan nga nagpalab-ot sang reklamo ang isa sa iya pumuluyo angut sa pagsinuktanay sa ila barangay bangud suno diri daw kaangay nga sobra-sobra na ini nga balor para sa ila nga mga pumuluyo.
Apang pahayag sang nasambit nga Punong Barangay, wala sang pagpinilitay nga natabo kag sa pagkamatuod suno diri antes ini ginpatuman nagpadala na sila sang sulat sa pumuluyo agud indi sila makibot.
Sa pihak sini, gintuad ni Bitoon nga may mga pumuluyo nga nagaprangka nga dako ini nga kadulaan sa ila ang P100.00 kada bulan, gani wala na niya ini gina-obligar nga magbayad kag nagahulat lamang sila kung sin-o ang may yara sang maayo nga kabubut-on nga maghatag sang nasambit nga balor.
Sa karun, may yara na sang masobra P4,000.00 nga nakolekta ang ila barangay kag ginsiguro man sini nga nakalista ang mga pangalan sang mga nagbalayad.
