Ginpasalamatan sang mga public utility vehicle (PUV) drivers sa Roxas City ang panibag-o nga rollback sa presyo sang gatong.
Sa interview sang Bombo Radyo kay Romel Atangke, isa ka jeepney driver nga may rota nga Sapian Capiz–Roxas City, vice versa, iya ginpahayag nga dako ang ila pagpasalamat bangud sa ika-duha nga pagnubo sang presyo nga makabulig sa ila adlaw-adlaw nga pamasada.
Apang suno sa iya, bisan may pagnubo sa presyo sang gatong, indi gihapon ini makasustiner sang ila galastuhan.
Ginapanawagan man niya nga suspendihon ang excise tax sa gatong agud mabuhinan ang palas-anon sang mga jeepney driver.
Nagalaum man ini nga hatagan sang konsiderasyon sang gobyerno ang aktwal nga kahimtangan sang kada transport group, pati na ang patas nga sistema sa pagkuha sang pasahero sa mga terminal imbes sa dalan.
