Tatlo ka hugna sang aerial explosions ang nagsanag sa kalangitan sang Doha, Qatar matapos nga nagpagwa sang National Emergency Alert may kaangtanan sa nagataas nga pamahog sa seguridad.
Suno kay Bombo Joseph Timothy Rivera, International Correspondent direkta sa Qatar, ginapatihan nga tuga ang mga paglupok sang missiles ukon drone interceptions sang air defense system sang Qatar.
Ginkumpirma man sang mga otoridad nga ang nabatian nga paglupok ang may kaangtanan sa “ongoing engaging operations” batok sa mga pamahog tuga sang pila ka mga pagpang-atake sang indi pa matumod nga pungsod.
Pahayag pa niya, nagpaguwa man sang paandam ang gobyerno sa publiko angut sa “elevated threat,” samtang nagapanugyan sa mga pumuluyo nga indi magpalapit ukon mag-uyat sang mga debris gikan sa posible nga pag-intercept.
Samtang, ginpahayag sang Ministry of Defense sang Qatar nga naka-eksperyensya sang pagpang-atake ang pungsod gamit ang mga drone nga ginapatihan naghalin sa Iran, apang gilayon ini nga na-intercept sang ila depensa.
Natabo ang ini nga mga insidente pila ka oras antes matapos ang ultimatum nga gintalana sang Estados Unidos sang Amerika batok sa Iran.
Dugang pa sini, nagabatyag man sila sang kakulba bangud sa sunod-sunod nga paglupok, apang nagapabilin nga alerto padayon nga nagabantay sa sitwasyon.
Wala man sang may nabalhag nga casualty kag napilasan sa insidente.
Sa subong, wala pa sang opisyal nga detalye ang gobyerno sang Qatar angut sa eksakto nga ginhalinan samtang nagapadayon ang imbestigasyon.
